“Linux-ის მომენტი” კვანტური გამოთვლებისთვის? ჩინეთმა თავისი პირველი კვანტური ოპერაციული სისტემა “Origin Pilot” ღია გამოყენებაში გამოიტანა

გლობალური კვანტური ტექნოლოგიების სფეროში მნიშვნელოვანი ცვლილებებია. ტექნოლოგიური სუვერენიტეტის განმტკიცებისა და გლობალური ეკოსისტემის შექმნის მიზნით, კომპანია Origin Quantum-მა თავისი ოპერაციული სისტემა Origin Pilot საჯარო ჩამოტვირთვისთვის ხელმისაწვდომი გახადა.

რა არის Origin Pilot? 

მაშინ, როდესაც IBM-ის (Qiskit) ან Google-ის (Cirq) პლატფორმები ძირითადად ღრუბლოვან (cloud) სერვისებზეა დაფუძნებული, Origin Pilot წარმოადგენს სრულფასოვან ინტეგრირებულ კვანტურ–კლასიკურ-AI ოპერაციულ სისტემას. ის კვანტური მანქანის “ტვინის” ფუნქციას ასრულებს და მართავს ყველაფერს — აპარატურული რესურსებიდან დაწყებული, კუბიტების (qubits) ფაქიზი კალიბრაციით დასრულებული.

2026 წლის განახლების ძირითადი მახასიათებლები:

უნივერსალური თავსებადობა: სისტემა მუშაობს სხვადასხვა ტიპის აპარატურაზე, მათ შორის ზეგამტარ კუბიტებზე, trapped-იონ-სა და ნეიტრალურ ატომებზე.

ლოკალური ინსტალაცია: პირველად ისტორიაში, მკვლევარებს შეუძლიათ გადმოწერონ და ლოკალურად დააინსტალირონ კვანტური ოპერაციული სისტემა, ნაცვლად მხოლოდ დისტანციური ღრუბლოვანი წვდომისა.

გაზრდილი ეფექტურობა: სისტემას აქვს პარალელური დავალებების შესრულების მხარდაჭერა და კუბიტების ავტომატური კალიბრაცია, რაც მნიშვნელოვნად ამცირებს ფიზიკოსების მხრიდან მექანიკურ შრომას.

პრაქტიკული გამოყენება: სისტემა მართავს ჩინეთის მე-3 თაობის კვანტურ კომპიუტერს — Origin Wukong-ს (72 კუბიტი), რომელმაც უკვე შეასრულა 810,000-ზე მეტი დავალება 120-ზე მეტი ქვეყნის მომხმარებლისთვის.

რატომ არის ეს მნიშვნელოვანი? 

კვანტური პროგრამული უზრუნველყოფის “გახსნით“, ჩინეთი ცდილობს დაამკვიდროს გლობალური სტანდარტები ამ სფეროში. ეს ნაბიჯი სრულად შეესაბამება ჩინეთის მე-15 ხუთწლიან გეგმას, სადაც კვანტური ტექნოლოგიები სტრატეგიულ პრიორიტეტად არის გამოცხადებული. გლობალური სამეცნიერო საზოგადოებისთვის კი ეს ნიშნავს ახალ, მძლავრ ინსტრუმენტს კვანტურ ალგორითმებზე სამუშაოდ, ყოველგვარი ფასიანი გამოწერებისა თუ დასავლური კორპორაციული შეზღუდვების გარეშე